Date Published: April 9, 2025

𝗣𝗔𝗛𝗔𝗬𝗔𝗚 𝗡𝗚 𝗣𝗔𝗚𝗧𝗨𝗧𝗢𝗟 𝗡𝗚 𝗞𝗔𝗕𝗔𝗧𝗔𝗔𝗡𝗚 𝗕𝗔𝗡𝗚𝗦𝗔𝗠𝗢𝗥𝗢 𝗟𝗔𝗕𝗔𝗡 𝗦𝗔 𝗠𝗔𝗞𝗔𝗟𝗨𝗠𝗔𝗡𝗚 𝗔𝗧 𝗗𝗜𝗦𝗞𝗥𝗜𝗠𝗜𝗡𝗔𝗦𝗬𝗢𝗡𝗚 𝗣𝗔𝗡𝗔𝗡𝗔𝗪 𝗦𝗔 𝗘𝗗𝗨𝗞𝗔𝗦𝗬𝗢𝗡

Mariin naming kinokondena ang kamakailang pahayag ni Gov. Peter Unabia sa isang kampanya sa Villanueva, Misamis Oriental, kung saan kanyang binigyang-kulay ang nursing scholarship bilang para lamang sa kababaihan at mas masaklap, para lamang umano sa “magaganda.”

Ang ganitong klase ng pananaw ay hindi lamang misogynistic kundi nagpapakita rin ng lubhang kawalang respeto sa dignidad ng bawat kabataang Pilipino, lalong-lalo na sa mga estudyanteng nagsusumikap abutin ang kanilang mga pangarap sa gitna ng kahirapan. Hindi dapat ginagawang sukatan ang kasarian o panlabas na anyo sa pagkakaloob ng edukasyon. Ito ay karapatan hindi gantimpala sa pisikal na anyo.

Bilang mga kabataang Bangsamoro, kami ay patuloy na lumalaban para sa isang lipunang makatarungan, inklusibo, at nagbibigay ng pantay na oportunidad para sa lahat. Hindi kami papayag na ang ganitong mapanirang pahayag ay balewalain. Ito ay insulto sa bawat kabataang babae, lalaki, at miyembro ng LGBTQIA+ na may pangarap na magsilbi at magtagumpay sa larangan ng propesyonal na serbisyo.

Nananawagan kami sa COMELEC at iba pang kinauukulang ahensya na imbestigahan ang insidenteng ito at magsagawa ng nararapat na aksyon. Ang isang lider na may ganitong klaseng pananaw ay hindi karapat-dapat sa posisyon ng pamumuno.

Hindi kami mananahimik. Ang edukasyon ay para sa lahat. Hindi ito dapat gamitin bilang laruan ng diskriminasyon.